ធ្លាប់តែឃើញល្បី តោះឥឡូវមកដឹងពី អត្ថប្រយោជន៍របស់ « មើមឈូកទឹកកក » ទាំងអស់គ្នា(YACON)

2021-07-20

មើមឈូកទឹកកក ត្រូវបានគេស្គាល់ថា ជាបន្លែ ដែលមានរូបរាងស្រដៀងទៅនឹងដំឡូងជ្វា ប៉ុន្តែចំណែកឯរសជាតិវាវិញ គឺមានលក្ខណៈខុសគ្នាទាំងស្រុង។

សាច់របស់មើមឈូកទឹកកក មានពណ៌សលាយលឿង និងមានរសជាតិឆ្ងាញ់ប្លែកដែលស្រួយដូចជាផ្លែប៉ោម និងផ្អែមដូចផ្លែឪឡឹកអញ្ចឹង ហើយវាក៏អាចបរិភោគស្រស់បានដែរ។ មើមឈូកទឹកកកមានប្រភពមកពីភ្នំ Andean ប្រទេសអាហ្រ្វិកខាងត្បូង ហើយត្រូវបានគេដាំដុះនៅភាគខាងជើងនៃប្រទេសកូឡុំប៊ី និងភាគខាងត្បូងប្រទេសអាហ្សង់ទីនផងដែរ។

ម្យ៉ាងទៀត វាត្រូវបានគេហៅឈ្មោះប្លែកៗគ្នាទៅតាមតំបន់ដូចជាប្រទេសខ្លះហៅវាថាជា ផ្លែប៉ោមដី ឬ ស្ត្រប៊ីរី YACON ជាដើម។ សព្វថ្ងៃមើមឈូកទឹកកក ត្រូវបានគេដាំដុះនៅក្នុងបណ្តាលប្រទេសជាច្រើន ហើយអ្វីដែលពិសេសនោះ វាបានចាប់ផ្តើមក្លាយជាប្រភេទអាហារសុខភាព ដែលមានលក់គ្រប់ទីផ្សារទាំងអស់នៅក្នុងប្រទេសអាមេរិក។

មើមឈូកទឹកកក ត្រូវបានគេប្រើប្រាស់ធ្វើជាទឹកសេរ៉ូជំនួសអោយបរិភោគស្រស់ផងដែរ។ មិនត្រឹមតែប៉ុណ្ណោះគេក៏ប្រើវាសំរាប់ជាអាហារូបត្ថម្ភក៏ដូចជា៖ ថ្នាំសម្រាប់អ្នកជំងឺទឹកនោមផ្អែម, សំរាប់រក្សារទម្ងន់, ជួយអោយបន្ទោរបង់បានស្រួល និងរក្សារសំពាធឈាមថែមទៀតផង។ ហើយបើយោងតាមការស្រាវជ្រាវបានកំណត់បង្ហាញថាមើមឈូកទឹកកក មានអត្ថប្រយោជន៍ជាច្រើនចំពោះសុខភាពដែលយើងនឹកស្មានមិនដល់។