ប្លែកមែន ! ហាងកាហ្វេ Manga ដែលទទួលបានការពេញនិយមបំផុត នៅទីក្រុងតូក្យូ
ដោយសារតែ Manga គឺជាសៀវភៅរឿងត្លុក ដែលទទួលបានការគាំទ្រពីសំណាក់ជនជាតិជប៉ុនគ្រប់វ័យ និងមានរឿងជាច្រើនប្រភេទដូចជា៖ រឿងស្នេហា, រឿងកំប្លែង និងរឿងផ្សងព្រេងជាដើម ហេតុដូចនេះហើយទើបបានជាគេបង្កើតហាងកាហ្វេ Manga ឡើងដើម្បីបម្រើអតិថិជន ២៤ម៉ោង អោយចូលមកអានសៀវភៅប្រភេទ Manga រាប់លានក្បាលដោយសេរី។
នៅក្នុងហាងកាហ្វេ Manga លោកអ្នកអាចមានជម្រើសស្នាក់នៅរយៈពេលខ្លី (៣ទៅ៥ម៉ោង) ឬស្នាក់នៅពេញមួយយប់ (៦ទៅ៨ម៉ោង)។ រីឯអ្នកខ្លះក៏បានជ្រើសរើសហាងកាហ្វេ Manga ដើម្បីស្នាក់អាស្រ័យជំនួសអោយសណ្ឋារគារផងដែរ ព្រោះវាមានតម្លៃថោកជាងឆ្ងាយណាស់។ ហើយជាទូទៅប្រសិនបើអ្នករើសយកសេវាកម្មពី ៣ទៅ៥ម៉ោង គឺវាមានតម្លៃត្រឹមតែ ១១៨០យេន ឬ ១២ដុល្លារអាមេរិកតែប៉ុណ្ណោះ។
អ្នកក៏អាចជ្រើសរើសបន្ទប់ណាមួយដែលអ្នកពេញចិត្តដូចជាបន្ទប់មានកុំព្យូទ័រ បន្ទប់គេងផ្ទាល់ដី និងបន្ទប់មានសាឡុងជាដើម។ ចំណែកឯម្ហូបអាហារវិញ អ្នកអាចយកម្ហូបខ្លួនឯងចូលបាន ឬទិញនំនែកដែលមានលក់នៅទីនោះស្រាប់ ហើយភេសជ្ជៈវិញ គឺផ្តល់ជូនដោយមិនគិតថ្លៃ (កាហ្វេ សូដា ប៊ីយែរ)។ អ្វីដែលសំខាន់នោះ គឺអ្នកអាចអាន Manga ដែលមានរហូតដល់ទៅរាប់សែនក្បាល គ្រប់វគ្គ និងគ្រប់ភាគផងដែរ។
សព្វថ្ងៃ ហាងកាហ្វេបែបនេះគឺមានភាពពេញនិយមណាស់ ដែលអាចរកបានសឹងតែគ្រប់ទីកន្លែងទាំងអស់នៅក្នុងទីក្រុងតូក្យូ។ បើនិយាយពីសេវាកម្មវិញគឺអាចនឹងខុសគ្នាទៅតាមទីកន្លែង ប៉ុន្តែអ្វីដូចគ្នានោះគឺអ្នកអាចអាន Manga បានតាមចិត្ត៕
ប្រភព ៖ បរទេស
ព័ត៌មានថ្មីៗ
