វិធីត្រាំខ្ទឹមស ជាមួយទឹកឃ្មុំ ដើម្បីព្យាបាលជំងឺ ៣មុខ
ការត្រាំខ្ទឹមស និងទឹកឃ្មុំគឺជាឱសថបុរាណមួយប្រភេទដែលត្រូវបានប្រើអស់ជាច្រើនឆ្នាំកន្លងមកហើយ ដើម្បីព្យាបាលជំងឺផ្តាសាយ ក្អក និងសម្រកទម្ងន់។ ដោយសារតែខ្ទឹម និងទឹកឃ្មុំវាមានលក្ខណៈសម្បត្តិក្នុងការជួយពង្រឹងប្រព័ន្ធភាពស៊ាំ និងសមាសធាតុធម្មជាតិមួយចំនួនទៀត ដែលត្រូវបានអ្នកវិទ្យាសាស្ត្របង្ហាញថាវាផ្តល់អត្ថប្រយោជន៍ល្អដល់រាងកាយ។
គ្រឿងផ្សំរួមមាន៖
• ខ្ទឹមស ១២កំពឹស
• ទឹកឃ្មុំ ចំនួន ១ពែង
វិធីធ្វើ៖
• អ្នកគួរជ្រើសរើសកែវ ឬក្រឡណាដែលមានមាត់ធំបន្តិច ដើម្បីងាយស្រួលដាក់ខ្ទឹមចូល
• ចំពោះខ្ទឹមអ្នកអាចដាក់ត្រាំទាំងមូល ឬកិនវាឲ្យម៉ត់បន្តិចក៏បានទៅតាមចំនូលចិត្តរបស់អ្នក
• ដោយជំហានទីមួយ អ្នកត្រូវយកខ្ទឹមមកបកសំបក រួចលាងទឹកសម្អាតឲ្យស្អាត ទើបយកវាទៅត្រាំនៅក្នុងទឹកឃ្មុំ ដែលដាក់នៅក្នុងកែវ ឬក្រឡ មានគំរបបិទជិត ហើយទុករយៈពេល ៣ថ្ងៃ
• បន្ទាប់ពីបាន ៣ថ្ងៃហើយ អ្នកត្រូវចាប់ផ្តើមបើកគំរបឲ្យបានរៀងរាល់ថ្ងៃ ហើយកូរវាបន្តិច ដោយអ្នកត្រូវធ្វើបែបនេះឲ្យបាន ១សប្តាហ៍
• ក្រោយពីបាន ១សប្តាហ៍ហើយអ្នកអាចយកវាមកទទួលទានបានជាមួយនឹងអាហារប្រចំាថ្ងៃ
• ខ្ទឹមនេះអាចទុកញុំាបានរហូតដល់ ១ខែ ហើយប្រសិនបើទឹកឃ្មុំវាឡើងខាប់រឹង អ្នកអាចយកវាដាក់កម្តៅឲ្យរលាយសម្រាប់ទទួលទានបាន។
ចំពោះអត្ថប្រយោជន៍របស់ខ្ទឹមសទឹកឃ្មុំនេះមានដូចជា៖
១/ ជាឱសថប្រឆាំងមេរោគ
ការស្រាវជ្រាវជាច្រើនបានបង្ហាញថាសមាសធាតុដែលមាននៅក្នុងខ្ទឹមសអាចប្រឆាំងអុកស៊ីតកម្ម ប្រឆាំងនឹងការរលាក និងប្រឆាំងមេរោគ។ ចំណែកទឹកឃ្មុំក៏មានសមាសធាតុជីវសាស្រ្តដែលមានលក្ខណៈប្រឆាំងនឹងមេរោគ និងប្រឆាំងបាក់តេរីផងដែរ។ នៅពេលពួកវាលាយបញ្ចូលគ្នាខ្ទឹមស និងទឹកឃ្មុំត្រូវបានគេចាត់ទុកថាជាឱសថធម្មជាតិក្នុងផ្ទះដ៏មានប្រសិទ្ធភាពបង្កើនប្រព័ន្ធភាពស៊ាំ និងធ្វើឱ្យសុខភាពទូទៅប្រសើរឡើង។
២/ អាចកាត់បន្ថយហានិភ័យនៃការគាំងបេះដូង
បើទោះបីខ្ទឹមសវាមានសភាពខុសៗគ្នាប៉ុន្តែអត្ថប្រយោជន៍របស់វាគឺត្រូវបានគេចាត់ទុកជាអាហារធម្មជាតិដ៏មានឥទ្ធិពល ដែលអាចជួយថែរក្សាសុខភាពបេះដូងបានល្អ។ ខ្ទឹមសអាចជួយបន្ថយសម្ពាធឈាម និងកម្រិតកូឡេស្តេរ៉ុលព្រមទាំងការពារការកកឈាមផងដែរ។ ដូចគ្នានេះដែរទឹកឃ្មុំសំបូរទៅដោយសមាសធាតុម្យ៉ាង ដែលដើរតួជាអ្នកជួយពង្រឹងសុខភាពសរសៃឈាមបេះដូង។
៣/ ជាឱសថបំបាត់គ្រុនផ្តាសាយ
ដោយសារតែខ្ទឹមសអាចប្រឆាំងទៅនឹងពពួកមេរោគដែលបង្កឲ្យកើតជំងឺផ្តាសាយបាន ហេតុនេះទើបវាអាចព្យាបាលជំងឺមួយនេះបានយ៉ាងមានប្រសិទ្ធភាព។
ក្រៅពីអាចព្យាបាលជំងឺហើយនោះ ខ្ទឹមស ជាមួយទឹកឃ្មុំក៏អាចឲ្យអ្នកស្រក់ទម្ងន់ និងការពារសុខភាពខួរក្បាលបានទៀតផង។
ប្រភព៖បរទេស
ព័ត៌មានថ្មីៗ
