មូលហេតុសំខាន់ៗ ដែលនាំឲ្យអ្នកភ្លេចភ្លាំងច្រើនទាំងនៅវ័យក្មេង!
ការភ្លេចភ្លាំងគឺតែងតែកើតមានឡើងចំពោះមនុស្សចាស់អាយុពី៥០ក្រាស់ឡើងទៅ ដោយសារតែការប្រែប្រួលនៃខួរក្បាល។ ប៉ុន្តែយ៉ាងណាមិញ អ្នកខ្លះគឺនៅក្មេងនៅឡើយទេ តែបែរជាពូកែភ្លេចច្រើនដូចជាមនុស្សចាស់អញ្ចឹង។ ដូចនេះហើយ តោះមកដឹងពីកត្តាចម្បងដែលបណ្តាលអោយការភ្លេចភ្លាំងនេះកើតឡើងចំពោះមនុស្សដែលមានវ័យក្មេង!
១.គេងមិនគ្រប់គ្រាន់
ការគេងមិនគ្រប់គ្រាន់ក៏ជាកត្តាបណ្តាលឲ្យភ្លេចភ្លាំងច្រើនដែរ។ អ្នកខ្លះប្រាកដជាមិនចាប់អារម្មណ៍នោះទេ ហើយតែងតែឆ្ងល់ថាហេតុអ្វីខ្លួនតែងភ្លេចនេះភ្លេចនោះ តាមពិតទៅគឺមកពីគាត់មិនសូវគេង ឬ ចូលគេងយប់ជ្រៅពេកជាដើម។
២.ប្រើប្រាស់ថ្នាំ
ការប្រើប្រាស់ថ្នាំដូចជា Antidepressants ថ្នាំបញ្ចុះសម្ពាធឈាម និង ថ្នាំផ្សេងៗទៀតក៏អាចមានឥទ្ធិពលទៅលើប្រព័ន្ធចងចាំផងដែរ។ ម្យ៉ាងទៀត វានាំឲ្យអ្នកដែលប្រើប្រាស់ពិបាកក្នុងការផ្ចង់អារម្មណ៍ និង ទទួលយកអ្វីថ្មីៗថែមទៀតផង។
៣.ក្រពេញទីរ៉ូអ៊ីត
ប្រសិនបើក្រពេញទីរ៉ូអ៊ីតរបស់អ្នកដំណើរការមិនល្អនោះទេ ដូចនេះវាក៏អាចប៉ះពាល់ដល់ការចងចាំរបស់អ្នកផងដែរ។ ហើយដើម្បីដឹងថាក្រពេញទីរ៉ូអ៊ីតរបស់អ្នកបំពេញតួនាទីបានល្អ ឬ អត់ អ្នកអាចធ្វើតេស្តឈាមដើម្បីពិនិត្យបាន។
៤.សុរា
ការទទូលទានសុរាលើសកំណត់នឹងបណ្តាលឲ្យអ្នកប្រឈមនឹងការបាត់បង់ការចងចាំខ្ពស់។ ទោះបីជាសុរាអាចមានឥទ្ធិពលខ្លាំង ឬ ខ្សោយទៅតាមមនុស្សក៏ដោយ ប៉ុន្តែអ្នកគប្បីបរិភោគក្នុងបរិមាណយ៉ាងតិចពីរកែវសម្រាប់បុរស និង មួយកែវសម្រាប់ស្រ្តីក្នុងមួយថ្ងៃបានហើយ។
៥.ស្រេ្តស និង ថប់បារម្មណ៍
ភាពស្រ្តេស និង ថប់បារម្មណ៍គឺតែងតែរំខានដល់ការផ្ចង់អារម្មណ៍របស់មនុស្សម្នាក់ៗ ដែលវានាំឲ្យលំបាកក្នុងការរក្សាទុកព័ត៌មានថ្មីៗក្នុងខួរក្បាល និង ពិបាកក្នុងការរៀនអ្វីថ្មីៗជាដើម។
៦.ជម្ងឺបាក់ទឹកចិត្ត
រោគសញ្ញានៃមនុស្សដែលកំពុងជួបប្រទះជម្ងឺបាក់ទឹកចិត្តគឺពិបាកក្នុងការផ្ចង់អារម្មណ៍ទៅលើអ្វីមួយ និង ងាយភ្លេចជាខ្លាំង។ ដោយពួកគេបាត់បង់ចំណង់ទៅលើអ្វីៗគ្រប់យ៉ាង ចូលចិត្តនៅឯកោម្នាក់ឯង និង គ្មានអារម្មណ៍ចង់ធ្វើអ្វីទាំងអស់៕
ប្រភព ៖ បរទេស
ព័ត៌មានថ្មីៗ
