ចង់កម្ចាត់សត្វមូស ងាយស្រួលទេដោយគ្រាន់តែអនុវត្តតាមវិធីទាំងនេះ

• 2022-11-11

អ្នកខ្លះគិតថាសត្វមូសងាយស្រួលក្នុងការកម្ចាត់ តែតាមពិតនោះវាគឺមិនស្រួលដូចការគិតនោះទេ ព្រោះមូសតែងតែលាក់ខ្លួននៅបរិវេណជាច្រើននៅក្នុងផ្ទះរបស់អ្នក ឬ សូម្បីតែនៅជុំវិញរបស់អ្នក។ ហេតុនេះហើយទើប ថ្ងៃនេះយើងនឹងបង្ហាញអ្នកអំពីវិធីងាយៗអាចធ្វើនៅផ្ទះខ្លួនឯងបាន ដើម្បីកម្ចាត់សត្វមូស!

១.ប្រើប្រភពស្ករ និងដបជ័រ
របស់ដែលត្រូវការ៖ ដបប្លាស្ទិក 2 លីត្រ និងរបស់ផ្អែមដូចជាស្ករ ឬ ទឹកឃ្មុំក៏បាន។
របៀបធ្វើវា៖ ដំបូងអ្នកត្រូវកាត់ផ្នែកខាងលើនៃដប ហើយដាក់គ្រឿងផ្សំដែលអ្នកបានជ្រើសរើសចូល។ បន្ទាប់មកអ្នកត្រូវដាក់ផ្នែកខាងលើនៃដប ចូលទៅក្នុងដបវិញ តែត្រូវដាក់បញ្ច្រាស។ បន្ទាប់មកជម្រើសដ៏ល្អបំផុតគឺដាក់វានៅកន្លែងងងឹតនៅក្នុងបន្ទប់របស់អ្នក ហើយរង់ចាំឱ្យមូសចូលទៅជិតវា។ ស្ករ ឬ ទឹកឃ្មុំនឹងទាក់ទាញពួកវា ហើយពួកវានឹងជាប់នៅបាតដប។

២.ប្រើដបជ័រ និងកាសែតមួយចំនួន
របស់ដែលត្រូវការ៖ ដបជ័រចំណុះ ២លីត្រ ទឹក ស្ករ ដំបែ និងកាសែតមួយចំនួន។
វិធីធ្វើ៖ ដូចវិធីខាងលើដែរ អ្នកត្រូវកាត់ដបខាងលើចេញ ហើយចាក់ទឹកក្តៅជាមួយស្ករចូល បន្ទាប់ពីទឹកបានចុះត្រជាក់ អ្នកអាចបន្ថែមដំបែខ្លះ ហើយដាក់ផ្នែកនៃដបដែលអ្នកកាត់ដាក់ទៅក្នុងដបវិញ។ រឿងចុងក្រោយដែលអ្នកត្រូវធ្វើគឺដាក់កាសែត ខ្លះនៅជុំវិញដប ដើម្បីប្រាកដថាមូសមិនអាចចាកចេញបានទេ។

៣.ប្រើចានតូចមួយជាមួយសាប៊ូ និងភ្លើងទៀន
របស់ដែលត្រូវការ៖ ចានតូចមួយ សាប៊ូលាងចាន និងទៀនមួយចំនួន។
វិធីធ្វើ៖ ចាក់ទឹក និងសាប៊ូចូលក្នុងចានតូច ហើយលាយវា។ បន្ទាប់មក អ្នកអាចដុតទៀន រួចដាក់ជុំវិញចាន។ មូសនឹងត្រូវបានទាក់ទាញដោយកំដៅដែលមកពីប្រភពទៀនទាំងនោះនឹងធ្លាក់ចូលក្នុងចានសាប៊ូ។

៤.ប្រើស្លឹកក្រៃ ឬ សំបកក្រូច
របស់ដែលត្រូវការ: សំបកក្រូចមួយចំនួន ឬ ស្លឹកក្រៃមួយចំនួន
របៀបធ្វើ៖ ដោយសារមូសស្អប់ក្លិនរបស់ស្លឹកក្រៃ ឬ សំបកក្រូច ដូច្នេះអ្នកអាចប្រើវាឱ្យមានប្រយោជន៍បាន។ ដោយអ្នកគ្រាន់តែដាក់របស់ទាំងពីរនេះនៅជិតខ្លួន នោះអ្នកនឹងអាចជៀសផុតការរំខានពីសត្វមូសបានយ៉ាងងាយស្រួល៕

ប្រភព ៖ បរទេស